La Usc di Ladins

L é na neva sociazion nasciuda chest’aisciuda te val, l’à inom ‘Fascegn’ e l se met dant desche moviment politich zivich che tol ite persones che vegn da desvalives setores de la comunanza, e anter chestes ence joegn componenc de la Neva UAL, per ge sporjer ai sentadins de Fascia na perferida democratica per la litazions provinzièles di 22 de otober. 

La presidenta e l vizepresident de chesta sociazion, Cristina Donei e Andrea Weiss, i l’à prejentèda a la stampa en lunesc ai 11 de setember a Poza olache l é stat envià ence l candidat president de Alleanza Democratica Autonomista, Francesco Valduga.

Defat, do aer valutà se se prejentèr a la litazions a na vida autonoma con n candidat president o se chierir na cordanza, l é stat dezidù de sostegnir apontin Valduga te la coalizion ADA.

»Sion stac contaté da desvalives partic – l’à dit Donei – e con Valduga aon troà na cordanza de vijion.« Ma soraldut te Valduga, descheche à dapò confermà l medemo candidat president, l é stat troà l empegn de tor ite tel goern provinzièl la persona che i fascegn cernarà desche sia raprejentanta.

»L é egn che aon n conseier ladin, ma ades volon poder contèr de più te la dezijions - à dit Donei e Weiss - e l é chest che ge aon domanà a Valduga desche President de la Provinzia. L é la pruma outa che ne vegn dat chesta arsegurazion, noi se tolon su la responsabilità de n empegn tel goern provinzial per ge dar ezelenza a noscia val.

De più su La Usc stampèda de vender ai 15 de setember.  (Lucia Gross)