La Usc di Ladins

Fora per chisc meisc passé l é stat desvalives evenc metui a jir da la Musega de Poza, en colaborazion con desvaliva autra realtèdes, per recordèr che chest an la sociazion compiesc la bela età de 90 egn. La Musega de Poza la tol ite na sessantina de sonadores e la é vidèda da 10 egn dal president Matthias Pezzei ‘Pencio’ e da beleche 30 dal maester Giancarlo Dorich ‘Cavei’. L é ence n muie de joegn, chest an n rua ite 4 o 5 de neves e i é adertura de 10, l numer maor anter duta la Museghes de Fascia e Fiem, chi che se à scrit ite al prum an di corsc del Pentagramma.

Duc é oramai usé a veder chest grop de sonadores se sproèr con scomenzadives neves che va mingol fora dal classich conzert, pissèdes apontin per chierir de engaissèr i sonadores che, coche disc l maester Cavei, »i stasc più temp a far proe che a sonar, donca se cogn se pissar ence valch da gustegol, percheche i se gode e no i se stufe massa«.

I festejamenc se à dejout jà te chisc meisc passé con desvalives evenc e i va inant per chest fin de setemèna; defat en sabeda ai 16 de setember vegn endò fat la ‘impresa’ storica de jir a sonèr su la Torns del Vaiolet. Per chi che no se recorda o no sà inout, se aon fat contèr dal maester Giancarlo Dorich coche la era stata enlouta.

De più su La Usc stampèda de vender ai 15 de setember.  (Lucia Gross)