La Usc di Ladins

Le ciampane de la gejia di Sènc Piere e Paul de Soraga le à sonà a festa en martesc ai 5 de setember. La comunanza parochiala à festejà Padre Giovanni Rossi del Baila che belapontin en chel dì l à compì 90 egn e l à volù dir messa anter soa jent.

Con el sun utar apede al paroch don Andrea Malfatti l era ence so fra Padre Mario che l stasc a Trent, don Erminio Vanzetta, don Luciano Mainini e don Alessio Pellegrin. N bel segn de vejinanza a Padre Giovanni che l se à emozionà canche l à tacà ite la zelebrazion. Don Andrea dantfora l à dit che l ejempie de vocazion al sacerdozie de Padre Giovanni ge va proprio do al prefazio: »è cosa buona e giusta« e te l’ocajion de soa festa de cedean l é giust l rengraziar per dut chel che l à fat per soa jent e en miscion te l’America Latina.

Te le orazion di fidei l é stat preà soraldut per l don de le vocazion, percheche sul ejempie de la familia de Padre Giovanni che ge à dat a la comunanza fies de devozion cristiana, sie amò chi che cern desche ideal de vita de servir Die e i frades.

A la fin de la zelebrazion don Andrea ge à sport en don doi libres de perdice de Papa Francesch e don Tonino Bello: »Saon che te piasc lejer – l ge à dit – chisc libres te sarà de didament per scriver toe perdice.«

De più su La Usc stampèda de vender ai 15 de setember.   (Monica Cigolla)