La Usc di Ladins

L era spetà da temp, e zacan l é ofizial: inant che sie fora l meis de otober la coa di fantolins a Soraga scomenzarà sia atività. 

I tempes se à mingol sperlongià a cajon del Covid e de dut l iter burocratich, ma la strutura, enjignèda da l’aministrazion del Comun de Soraga, la é a post jà da n trat, ades i é do a neteèr su dut daite e a fenir vèlch picol lurier de fora. Ence la pèrt burocratica é ruèda a piz e te la setemèna dai 20 ai 27 de setember l é stat tout su la pruma enscinuazions.

Ge aon domanà la ultima neves a la Conseiera de procura Mirella Florian, che la se à cruzià dal scomenz de chest projet e ades l’à palesà sia sodesfazion per l travert arjont.

»Son dassen contenta – ne à dit Mirella Florian – de chest resultat che vegn arjont do egn de empegn e voi rengraziar i ombolc e le aministrazion de Soraga che à portà inant chest projet, e per l’aministrazion atuala ge die n devalpai particolar a la vize ombolta Sandra Bussolon che se à dat jù per poder sporjer ambienc dassen bie e de calità.

Al scomenz se pissaa de jir envers na gestion direta, donca con assunzion de personal diretamenter da man del Comun General, do enveze dessema ai ombolc l é stat dezidù de ge la dar su a na Coprativa. L é stat fat l bando da man de l’APAC, l’Agenzia provinzièla per i apalc e contrac, l é ruà ite doi domane e a venjer la gara l é stat la la Coprativa soziala ‘La Coccinella’ de Cles. Ades sion do a far duc i controi che ge vel far dant de sotscriver l contrat.«

De più su La Usc stampèda de vender ai 29 de setember.  (Lucia Gross)