La Usc di Ladins

Na bela neva tel ciamp de la musega ladina. I PopCorner à metù fora l’ultima de la trei cianties che i à portà dant al Ladiniatour e che no era amò da poder troèr su la piataformes streaming. La ciantia l’à inom ‘November’.

»Aon volù la far vegnir fora chest meis percheche chel che vegn contà te la ciantia l sozede proprio te chest trat de temp de uton – ne à dit Melany Locatin, una de la trei ciantarines del grop. L’aon scrita duc ensema, descheche aon fat enscin ades ence con le autre doi ciantie: ‘Tizar te fech’ e ‘Mudament’. Per scriver chesta ciantia sion ponté demez da la imagine de na ciandeila, la lum de la ciandeila ne à fat capir tant soraldut tel temp de Vaia canche se aon troà duc zenza lum te ciasa, zenza fonins e tecnologia e donca se stajea dintornvia le ciandeile a se la ciacolar, a grignar, a jiar a jeghes che no se jiaa da n pez. Chesta ciantia vel proprio dir che chel moment ne à fat capir i veri valores de la vita che de spes che no se ge peissa e i dajon per segur. En realtà i valores del amor, de la familia, del calor, de star ensema, de grignar, i é n muie emportanc. Tel refrain vegn dit: »regalame pura l ciel e la luna ma gio stae chiò e chel moment no volesse l baratar con nia de auter«. Ades no ne resta che scutèr ‘November’ del grop PopCorner.

 (Monica Cigolla)