La Usc di Ladins

L plindernament di ofizies di Servijes linguistics del Comun General e de l’Union di Ladins de Fascia te la Ciasa de la Moniaria no é amò rué a compiment, ma endana na part del frabicat storich sora la calonia a Sèn Jan à troà la destinazion più adatada per chest temp del an. Defat te la veia stala, olache l restaure à metù al luster la cianal de legn, sot l reout de sasc, l Comun General de Fascia à logà la Sènta Familia: trei gran statue che ti egn passé vegnia logade te piaza a Poza, olache ades l é stat cernù decorazion desferente. 

De fora, la steila enlumenada moscia l usc, che vegn avert ogne dì da doman e serà da sera, per poder jir a adorar l Bambin. E daite ence le lum deida a crear na ambientazion de gran sugestion: somea proprio de sentir le note de la bela ciantia da Nadal del Canori “Te cianal de legn...”.

Na bela scomenzadiva per valorisar l lurier fat, che à soscedà n muie de aprijiament e fasc pissar che chela stala podarà amò vegnir desfrutada per de autre scomenzadive enteressante ence fora per l an.  (LG)