La Usc di Ladins

Te la vita no l é emportant cotanta de robes che se é bogn de aer, ma piutost cotenc de leames che se é bogn de strenjer. L é chest un di ensegnamenc più fogn del roman ‘L Picol Prinz’.
N liber che ogne bez cognessa lejer, e no demò, ence i gregn pel troèr laite paroles e frases che fèsc pissèr, che fèsc grignèr e che fèsc pianjer. Percheche ogneun l à ite de se n picol prinz.

Da pec dis l é vegnù fora na neva publicazion, nasciuda da na idea de Paolo Rasom amò canche l era maester de la Musega Auta Fascia. El, adum a Michela Marangoni de la Sociazion Antermoia, de dezember del 2021 aea metù ensema n projet per conjobièr musega e spetacol de teater per bec, joegn e gregn. I aea pissà de spilenèr L Picol Prinz, na contia n muie cognosciuda de Antoine de Saint-Exupéry, vegnuda fora del 1943. L spetacol l é stat portà sun paladina de dezember del 2021 de gra al sostegn del Pian de Joegn La Risola. Tel spetacol i personajes de la contia é stac spilené dai bec e la Musega Auta Fascia l’à sonà i toc de compagnament. »Chel che l é vegnù fora – à dit l maester Paolo Rasom – l é stat na esperienza fora de anter e de gran valuta.«
L projet à abù dassen n bon ejit e coscita l é stat dezidù de l fèr doventèr n audioliber, acioche l reste ence per l davegnir. 
»L maester Paolo – ne à spiegà Evelyn Bortolotti, responsabola di Servijes Linguistics e Culturèi del Comun General de Fascia – ne à domanà de ge far le traduzion di tesć. Se trata de n adatament del test original fat da na ciasa editora de Roma, la Scomegna edizioni musicali. No l é la verscion completa del roman de Antoine de Saint-Exupéry, ma più o manco n terz. 

De più su La Usc stampèda de en vender ai 12 de jené.  (Monica Cigolla)