La Usc di Ladins

12 operes de artistes e artisć di trei teritories de Trentin, Sudtirol e Tirol, cernudes dal MART de Rorei, dal Museion de Busan e da Tiroler Landesmuseen, é states metudes fora tel meis de jené te la sala esposizions del Liceo artistich a Sèn Jan, a la leta di studenc, che con si dozenc de desvaliva disciplines i à podù jir a les veder e les conscidrèr a livel tecnich, scientifich e emozionèl. 

Dut chest aldò de n projet che à inom ‘KIDS – Èrt a scola’, che dal Tirol travers l’Euregio l se à slarià fora ence te noscia Region, col obietif de portèr la operes te la scoles di raions de lengaz talian, ladin e todesch e envièr i studenc a les veder dal vif e a se fèr sia opinion critica, per tor ite semper de più la generazions joenes ti zircuic de l’èrt de anchecondì.

Te chest chèder chest an l é nasciù la mostra itineranta dal titol ‘Stories y corps’ che met dant l conzet de ‘corp’ te manieres desferentes, con lurieres grafics, fotografies, video o etres materiai e che tegn cont de ironia, sensualità e emotività. La mostra é do a jir a roda per 6 scoles, anter chestes ence l Liceo artistich de Gherdena a Ortijei, e en vender ai 26 de jené l é stat la zerimonia finèla apontin tel Liceo de Fascia, a chela che à tout pèrt studenc e dozenc de la Scola ladina ensema con Thea Unteregger, che à rencurà la mostra ensema con Heidi Kurz, e Carlo Tamanini, responsabol de l’Area educazion-mediazion del MART.

De più su La Usc stampèda de en vender ai 9 de firé.  (Lucia Gross)