La Usc di Ladins

Cun 58 usc a öna y 6 astenjiuns á le consëi regional dl Trentin – Südtirol aprové incö na moziun presentada dal Team K, che impegnëia la Junta regionala sciöche ince les Juntes dles döes provinzies da regolamenté l’esposiziun dla bandira ladina ti comuns ladins de nosta regiun. Na dezijiun che toma do passa 100 agn da canche la bandira ladina cun sü corusc bröm, blanch y vërt é gnüda adorada le pröm iade. Al ê le 1920. Cun l’azetanza de chësta moziun vëgnel preodü che la bandira ladina vëgnes metüda fora ala per dlungia les bandires dla Talia, dl’Europa, dla Regiun y dla Provinzia.
Bele l’ann passé â la Lega tres l’aconsiadú Massimo Bessone presenté na moziun similara por la bandira ladina, che ê indere gnüda refodada, ince dala SVP. Sostëgn plëgn indere en chësc iade por por na moziun – sciöche l’assessur ladin Daniel Alfreider á dit te so intervënt – "che vá ince a öna cun les normatives atuales". Y le presidënt dla Provinzia de Südtirol Arno Kompatscher á tut l’ocajiun da alzé fora "le sostëgn a vigni iniziativa che vá dl vers da renforzé la cultura y le lingaz ladins". Gran sodesfaziun ince por l’assessur regional Luca Guglielmi, che á baié de na bandira che é – ince do 100 agn da süa nasciüda y zënza n reconescimënt – "ciamó via ti cörs dles popolaziuns ladines."

Deplü sön chësta dezijiun podarëise lí t’La Usc stampada dl’edema che vëgn  (pablo)