La Usc di Ladins

En sabeda ai 4 de mé al Palaluxottica de Ègort FPB Cassa de Fascia, Primier e Belun à chiamà ite sia radunanza ordenèra per ge prejentèr ai sozi n bilanz staif e che cresc, stolza de sia prejenza sul teritorie.

L president Carlo Vadagnini, do aer rengrazià l Grop Luxottica per ge aer dat lèrga te n scito iconich per l teritorie, l à metù al luster soraldut la straordenèra azion sozièla de la Cassa Rurala che via per l 2023 à dat fora passa 1 milion de euro a sostegn de scomenzadives de carater umanitarie, culturèl, sportif e de spas, didan a tegnir su l’identità del teritorie e l svilup del benstèr de duc.

Via per l 2023 l é stat avert la neva filiala de Belun, la diejema te chesta provinzia, a testamonech de n empegn semper più fort te chisc teritories. Via per l an passà la Cassa à ence comprà l ex Hotel Corona a Moena olache vegnarà fat fora i neves ofizies de la senta de la Banca, do i lurieres de restruturazion che jirà inant per presciapech doi egn; amò apede la Cassa la é do che la porta inant investimenc te la provinzia de Belun a sostegn de la domana semper maora de servijes da man del teritorie.

De più su La Usc stampèda de en vender ai 10 de mé.