La Usc di Ladins

A Moena l é en cors i lurieres per l toch de troi resservà a la rodes e a chi che va a pe che da sot ju Moena rua fin lo dal Navalge. Na opera conscidrèda strategica per la segureza de duc chi che ades va co la roda su per stradon e ence per miorèr la segureza de la èghes de la Veisc. 

En cont de chesta infrastrutura, che é stata projetèda dal Servije Bacini Montani de la PAT per n cost de passa n milion de euro per n chilometer e 200 metres de streca, e la se met dant desche ejempie de segureza e ence de eco-sostegnibilità, ajache la vegnissa fata en pèrt proprio tel alveis de la Veisc, l architet moenat Carlo Ganz à uzà fora dubies e cruzie. 

»Se àlo mai vedù – scrif Ganz – na pista ziclopedonala tel ghebo de n ruf che, vedù i mudamenc climatiches di ultimes egn, l pol deventar de colp pericolos se l é piövete fora de anter? Olache la Carta de Sintesi di pericoi de la PAT la met l livel de maor pericol (P4) e vegn dit che: ‘te le aree de gran pericol vegn descomanà ogne atività de mudament urbanistich e de frabica, fora che chele de prevenzion del pericol’; donca opere de prevenzion, no troes per le rode. Perauter – scrif amò Ganz – tel zenter de Moena i é do a far gran opere per meter en segureza l Rif de Costalongia e 200 metres più en ju i fasc na ziclopedonala te mez ruf: l trionf de l’incoerenza.

De più su La Usc stampèda de en vender ai 31 de mé.  (Lucia Gross)