La Usc di Ladins

Nasciuda del 2011 forin Fiem, la sociazion »Il Germoglio« l’à dapò ciapà pe ence te Fascia e oramai la dombra passa 200 sozi. La fèsc pèrt de chela realtà che à inom GAS (Gruppi Acquisto Solidale) e sia maor atività l é chela de coordenèr n sistem che permet de aer n raport diret coi fornidores, che i cogn aer carateristiches pervedudes soraldut per la coltivazion eco-sostegnibola e per l’etica e i deric di lurieranc, e a chesta vida de aer ence n raport cost-calità mior, tant per chi che produsc che per chi che compra.

I referenc per Fascia del GAS «Il Germoglio« l é Quirino Zulian de Cuz e Nicola Decrestina da Palua. Zulian ne à dit che i fornidores i é presciapech 70, beleche duc de magnadiva (demò na picola pèrt i à prodoc de netijia o guanc) donca fruc e ortames, cèrn, formaes, vèlch de pesc, semenzes e c.i.

Podede lejer dut su La Usc stampèda de en vender ai 6 de dezember.

Vèlch de più sul GAS de Fascia e Fiem se podarà l saer ence en lunesc ai 9 de dezember da les 20:30 te Ciasa de la Moniaria a Sèn Jan, en ocajion de la prejentazion del codejel del Comun General de Fascia ‘Entener e se fèr entener’ che à per titol »Jir a proveder, cojinèr e magnèr a na vida ecosostegnibola e sèna«, ajache a chesta prejentazion tolarà pèrt ence i referenc de la sociazion de compra solidala de noscia valèdes.  (Lucia Gross)