La Usc di Ladins

Se l’energia che se crea a bater la mans podessa vegnir desfrutèda e data fora ai utenc, l Consorzie Eletrich de Poza l aessa jà metù ensema na bona produzion per l 2025 en vender ai 16 de mé, te nience 2 ores de radunanza, olache i batimans no se à sparagnà e la rejons é states desvalives.

En realtà, descheche à sotlineà tant l president Giancarlo Pederiva che l diretor Dino Detomas, del 2024 la produzion de energia é stata più che bona: l’èga vegnuda ju dal ciel l an passà, soraldut d’aisciuda, à permetù de ruèr a 29 milions de kWh de produzion, fosc no la maora ma anter la prumes te la storia del Consorzie. Energia che, ensema a chela comprèda (zirca etres 14 milions de Kwh) met ensema 43 milions de kWh che l CEP à abù a la leta l an passà: desche semper ti momenc de maor produzion e mender consum la pel vegnir venuda a etres distributores, ma da chisc distributores l CEP cogn enveze la comprèr ti meisc de turism che fèsc crescer l consum fora de mesura.

Chest bon ejit l é stat aproà da duc a una con n prum batiman, dapò i sozi à batù la mans amò più debel a sentir tant gran che l é l tornacont a esser sozi, ma amò ence per  sotlineèr la vejinanza per l pont più senester, l azident dai 14 de oril, e l rengraziament a duc chi che à lurà dì e net per chierir de ressolver la situazion col mender dan possibol.
E en ultima amò n batiman é jit a la dependenta che à fenì sie lurier do 42 egn tel CEP.

Se pel lejer dut su La Usc nr 19 dai 23 de mé: sul sfoi stampà che se pel troèr ence te la boteighes de sfoes de la valèdes ladines o sul pdf per i aboné al e-paper.


 (Lucia Gross)