La Usc di Ladins

Presciapech na cincantina de persones se à binà a Pera en sabeda ai 17 de mé per la radunanza generèla che l’Union di Ladins de Fascia à chiamà ite te la bela sala storica del Hotel Rizzi de Salin a Pera, lech ideèl per ge sporjer a si sozi l mior azet e fèr ence mingol de festa.

Prejenté da la conseiera Lucia Gross l é stat i intervenc de desvalives raprejentanc, pean via ben segur dal president Fernando Brunel, che da 12 egn l é a cef de l’Union, ma militant ladin da 60 egn.

Brunel à recordà la fondazion ofiziala de la sociazion acà 70 egn, ai 19 de mé del 1955, e i egn dant col nascer de n moviment ladin. Na storia longia de idealism e amor per la patria ladina e nosc lengaz e de revendicazion di deric de n popul – l à dit – che se pel lejer en curt tel ‘ventalie’ che aon enjignà (na infografica storica data en don ai sozi), che però no l moscia i cruzies e l temp che à dat per l ben comun i militanc te chi egn. Militanc che gio recorde e che duc aon l doer de recordar, percheche l é per soe batalie che ades l é l Istitut Cultural, l Comun General con si Servijes linguistics e la Scola Ladina de Fascia, con chi che aon semper abù na bona colaborazion che speron che la vae inant, e anchecondì aon na zopa de publicazion ladine che ne dasc l met de cognoscer l ladin e soa cultura. Volege ben a nosc lengaz, rejonalo te vigni moment e zenza paura te dute le manifestazion – à dit amò Brunel...

Se pel lejer dut su La Usc nr nr 19 dai 23 de mé: sul sfoi stampà che se pel troèr ence te la boteighes de sfoes de la valèdes ladines o sul pdf per i aboné al e-paper.


 (LG)