La Usc di Ladins

En mercui ai 21 de ma s’á le Consëi comunal nü de Badia incunté por la pröma sentada. I aconsiadus che á ciafé la crëta di zitadins pro les lîtes ai 4 de ma é rová adöm dales 8:30 tla ciasa de Comun a Badia. Al’ordin dl de ê la conscidraziun dla condiziun de litabilité dl’omblt nü, sciöche ince chëra di aconsiadus. Inant éra jüda cun le joramënt da pert dl ombolt Christian Pedevilla y l’aprovaziun dla Junta nöia. Sciöche al é preodü dal regolamënt, é la sentada gnüda daurida dal aconsiadú plü vedl, Raimund Irsara, che á condüt le Consëi tres i pröms punc al ordin dl de, denanche i passé la parora al’ombolt.

Tla presentaziun de süa proposta de Junta á l’ombolt detlaré da avëi tut en conscidraziun l’orenté di zitadins, jon do ales usc ciafades dales lîtes, ciaran indere ince ales porsones plü adatades da surantó chësta inciaria dër impe­gnativa y che se damana na gran desponibilité. Ala fin á la proposta dl ombolt arjunt l’aprovaziun al’unanimité.

La junta nöia é metüda adöm da: Werner Pescosta (lista »Deburiada«), Raimund Irsara, Sabine Tavella Pescollderungg, Jessica Flöss Dapoz y Elvis Burchia (dla lista »Badia–La Ila–San Ciascian«).


Deplü ciafëise da lí tla ediziun nöia da incö, vëndres ai 23 de ma!