La Usc di Ladins

Gran pert de chëi che ie unic nsëira ala prima senteda dl Cunsëi de Chemun nuef de Urtijëi se aspitova bën, che la Lista Unica y la Svp ne n’ebe mo nia abinà n cumpromis per na Jonta nueva. Bele i dis dant àn sun i social network dla Lista y dla Svp liet, che l ne n’ie nia na cuestion scëmpla, sëntel pu śën te Chemun 9 unselieres dla Lista Unica y 9 dla Svp. L ie debujën de na coalizion y nscila sà tramedoi pertes che i uni ne possa fé nia zënza i autri. Ma al mumënt ne n’uel mo deguna dla doi pertes dé do y n audiva for inò vel’ un o vel’ auter cunselier che rujenova bele de n “cumiser”, coche de n pericul che manacia l Chemun. 

Do n valguna tratatives danter la doi pertes fòven bele dan la senteda da inier ruvei a una che la miëura soluzion ie 3 cunselieres per un te Jonta: trëi assessëures per la Lista Unica y trëi per la Svp. Ma l rëm ie pra i inuemes y dantaldut pra un n inuem, chël de Ewald Moroder. 

L ambolt Tobia Moroder dla Lista Unica, che à l duvier de mëter su la Jonta, ne se la vëija nia sëurora de lauré deberieda cun l candidat ambolt dla Svp Ewald Moroder. Ël y si grupa ie dla minonga che l ie debujën de n “team” sterch te Jonta, cun jënt che se à crëta y che uel lauré deberieda bën per dui cin’ i ani dla legislatura. Avëi n candidat ambolt y ex ambolt te Jonta ne n’i, aldò de Tobia Moroder y dla Lista Unica, nia velch de idéel.

Dal’autra pert la Svp che dij che n dëssa respeté l ulëi di litadëures y tò ite te Jonta i trëi cunselieres plu litei dla Svp: Ewald Moroder, Armin Lardschneider y Lara Moroder. N dëssa ti cialé ala cossa y no ai inuemes y, per l bën dla cumenanza, cialé de se unì cun duc. L ie puscibla lauré bën, sce n uel. Chësc si pont de ududa. 

La cuestion resta: pòssen pa lauré bën cun zachei canche l mancia la crëta? Dëssen pa cialé de l fé per respeté l ulëi di litadëures y tò ite nce d’autri ponc de ududa o no?

L Cunsëi se anconta inò n juebia ai 29 de mei, audëi sce nchin  iló iesen boni de abiné n cumpromis.

Elisabeth Kostner  (Elisabeth Kostner)