La Usc di Ladins

L ombolt Giulio Florian à prejentà ofizialmenter la jonta, che tol ite ben 3 eles e la se aea jà binà. A ogne conseier ge é stat dat su na encèria e podarà esser n referiment per duc i sentadins.

Chiamà ite ai 20 de mé da les 9 da sera, l Consei de Comun de Sèn Jan é stat vidà te la pruma scontrèda da la conseiera più »desvalivamenter joena« coche à dit a na vida ironica la medema Mirella Florian.
Con sia longia esperienza aministrativa, dant a Poza e dapò te la Scola e te Comun General, Florian à avert la scontrèda con n intervent per ladin per rengrazièr la jent, chela che ge à dat la stima e chela ruèda te sala (zirca na dosena de persones) col envit a seghitèr a tor pèrt. L’à dit che zenza na mendranza i aministradores à na responsabilità amò maora de ge dèr na resposta ai sentadins e che se cogn lurèr con gaissa e spirit positif per ge fèr front a la dificoltèdes che segur no menciarà.

Do i passajes de obligh de verifica di requisic, l ombolt Giulio Florian à fat sie jurament per ladin e l à prejentà sia Jonta, che l é la più resa che dutes, con la maoranza de eles.

Se pel lejer dut su La Usc nr nr 19 dai 23 de mé: sul sfoi stampà che se pel troèr ence te la boteighes de sfoes de la valèdes ladines o sul pdf per i aboné al e-paper.


 (Lucia Gross)