La Usc di Ladins

La sociazion Rencureme e l Servije Sozio-assistenzièl ‘Spazio Argento’ del Comun General de Fascia, tel chèder del ‘Projet de Trei egn per l Svilup de na Comunanza Amica de la Persones con demenza’, se à pissà de ge sporjer a la persones de la comunanza de Fascia, en particolèr a cheles de età, l’ocajion de tor pèrt a cater spazirèdes te la natura da fèr a na vida doucia e lijiera, col compagnament de la espertes zertifichèdes de ‘Bagn de bosch’ Katiuscia Rasom e Tatiana Tulini, che les porta inant con convinzion l’idea del poder preventif e terapeutich del ambient natural che aon entornvia.

La pruma spazirèda sarà en jebia ai 26 de jugn, da la does fin les cater domesdì, pean via dal parch di jeghes de Fontanac e dapò amò trei outes semper de jebia, ti medemi oraries, ai 3, ai 10 e ai 17 de messèl la spazirèdes (semper che l temp lasce) les vegnarà fates pontan via da Soraga, da Cianacei e endò da Soraga.

La partezipazion é debant, pel tor pèrt no più che 15 persones ogne outa e ge vegn dat prezedenza a chi che à 65 egn compii. Ge vel se enscinuèr diretamenter da la doi compagnadores Katiuscia e Tatiana, ai numeres 393 3377940 o 349 5455352. De autra informazions é a la leta sui social e sul sit del Comun General de Fascia anter i avisc e comunicac.

Se pel lejer dut su La Usc nr 23 dai 20 de jugn: sul sfoi stampà che se pel troèr ence te la boteighes de sfoes de la valèdes ladines o sul pdf per i aboné al e-paper.


 (LG)