La Usc di Ladins

Ai 14 de jugn l é la giornèda mondièla del donator de sanch metuda su del 2004 dal OMS. Te chesta dì a Tieser, olache la comunanza à festejà ence l patron Sènt Eliseo, l é stat binà duc i gropes de volontadives de la valèdes de Fiem e Fascia per recordèr e uzèr fora l’emportanza del don del sanch. L é stat dit messa grana da don Albino Dell’Eva, don Bruno Daprà e don Robert che à festejà ence i 25 egn de sacerdozie e dapò duc i gropes é jic en defilèda con sia bandieres fin te piaz Cesare Battisti. L era i donatores de l’ADVSP, AVIS, ADMO, AIL e de la Lega Pasi Battisti ensema a la Musega da Tieser, ai Alpins e ai Studafech ajache l prum grop de donatores de sanch l é nasciù a Tieser del 1962 proprio da n grop de Studafech. Na ocajion donca, descheche à dit l president de l’ADVSP Clerio Bertoluzza, per ge render merit ajache l é amò 5 pesones de chel prum grop e per rengrazièr duc chenc.

Te piaz l é stat inaugurà na instalazion dedichèda al don del sanch fata dal artist Ciro Doliana che l é stat donator per n muie de egn. L titol de l’opera l é »l braciacol a la vita«.

Se pel lejer dut su La Usc nr 23 dai 20 de jugn: sul sfoi stampà che se pel troèr ence te la boteighes de sfoes de la valèdes ladines o sul pdf per i aboné al e-paper.





 (Monica Cigolla)