La Usc di Ladins

L à inom »L É D E C« e l é l acronim del dit »L É Dut En Craut«. Pean via da chest conzet n grop de touses e fenc de Fascia à pissà de proèr a viventèr l panoram culturèl de noscia val portan inant n »laboratorie de projec en ferment«. Fosc apontin pissan al valor de la fermentazion, la pruma scomenzadiva publica de la é stata endrezèda al Rampeèr de Ciampedel, olache l é n laboratorie da birèr. E coscita apede a la bira, ai 13 de jugn te chela biraria à fermentà ence la ciacoles, ma de cheles riches de cognoscenza, cultura, amor per la tera e atenzion per la ezelenzes de noscia val. 
»L é persones del post che à n muie de stories, projec, esperienzes enteressantes – disc la promotores de LÉDEC – che la maor pèrt de la jent ence te noscia val no cognosc«. Per les fèr cognoscer, enveze che les scriver sun n liber, l é stat pissà de les portèr dant a na vida più lijiera e gustegola: les contèr dedant a na bira o vèlch da beiver, te n contest che deide ence la sozialisazion. Ence sozialisèr defat l é n valor dassen emportant te chisc tempes, olache dut ne spenjessa a se n stèr seré te na majon con duc i conforc, se pascentèr de televijion e social e se fèr portèr a cèsa dut chel che serf. 
Enveze na! Veste meter cotant più bel che l é se binèr e poder rejonèr visavì con persones che magari te aees amò vedù te val, ma che no te aees nience idea de la robes enteressantes che les fèsc?
Coscita Cinzia, Marti, Sara, Fabio e etres à endrezà »Birrette e ciacoles«, n titol che spieia n auter valor fondamentèl de chest grop, la inclusività, da ogne pont de veduda, ence chel linguistich. 
Na scontrèda che à tout ispirazion da la »Human Library«, na idea nasciuda al scomenz di egn ’90 a Copenhagen e che del 2003 la é stata recognosciuda dal Consei d’Europa desche bona pratega e la se à slarià fora te dut l mond. 
De chisc libres che vif, che rejona e che respon a la domanes, chel domesdì a Ciampedel n era 7...

Se pel lejer dut su La Usc nr 23 dai 20 de jugn: sul sfoi stampà che se pel troèr ence te la boteighes de sfoes de la valèdes ladines o sul pdf per i aboné al e-paper.


 (Lucia Gross)