La Usc di Ladins

Al é sté bindebó de alarm en mertesc ai 24 de jügn, püch do les 15:30. I Stödafüch da La Val y San Martin, mo ince l’Aiüt Alpin da La Val y le joler dl Aiüt Alpin é gnüs cherdá a La Val, olache al gnô lauré por cuncé sö la strada da Pastrogn cina Col de Ví. Iló él spo sozedü la desgrazia. N laurant che rovenô na pachera – n ël da San Ciascian – é rové cun le meso sura strada jö y s’á pormó archité cotan dessot: "danter 40 y 50 metri", sciazëia le comandant di Stüdafüch da La Val Paul Pezzei. Bele da atira án odüche la situaziun ê zitia: l’ël ê asmacé cun les iames sot le brac dl meso ite, porchël êl prescia da le trá fora. I stödafüch söl post á insciö fistidié da taché jö la mascin, tratan che le joler á lascé jö la doturia d’emergënza por pité les prömes cures. Les ferides ê bindebó pesoces, insciö é le paziënt gnü trat sö cun la binda y joré de prescia tl ospedal da Balsan. Por inrescí co che l’inzidënt é gnü a s’al dé, él rové alerch la Verda de Finanza, che á ince secuestré le meso y á le compit da recostruí le sozedü. Sön la situaziun atuala dl ferí ne podunse dí nia, mo i podun ti sporje les mius audanzes por le tëmp che gnará.  (pablo)