La Usc di Ladins

Chesta l é na storia vera, l é la »storia de na zelula mata«. Ma co? Direde. Ei, na storia vera, de na protagonista vera che l’à regoeta te n liber e l’à fat ence i dessegnes.

Ve prejenton Elisa Sommavilla, la é da Moena, da 14 egn la stasc a Verona olache la é maridada e l’à trei fie, le trei A, de 11, 9 e 5 egn.

Elisa l an passà l’à descorì de aer n tumor al piet, per fortuna la l à ciapà per temp, l’à fat le terapie e la é varida. Endana l’à dezidù de scriver n liber belapontin dal titol »Storia di una cellula impazzita« che l é vegnù fora ai prumes de mé e l se ouc soraldut ai bec.

L’idea la me é vegnuda mingol a l’outa – ne conta Elisa. Endana la malatia mie fie seghitaa a me far domane, le me domanaa da olache vegn l tumor, coche l cresc, perché, cotante sort de tumores che l é e coscita inant. Gio no troae nesciun test adatà che ge fae entener e coscita me é pissà che podee proar gio a meter ju valch dessegn per ge far capir mingol miec e coi dessegnes l é nasciù ence l test.

Coluna él la storia de chesta zelula che doventa mata?

»Ajache no saane co ge l dir a nosce fie, sion jic dal psicologh de la Breast Unit che ne à dit che ai bec se cogn ge dir la verità senó se pert soa fiduzia, ge contar con semplizità. Gio tel liber rejone de la malatia da n pont de veduda de la zelula. Dute le zelule le fossa brave percheche ele enstesse le saessa se conciar da soule, ma da zeche ora le scomenza a se conciar zenza che le aesse de besegn e coscita le crea l tumor.«
La storia va inant ma no ve conton nia de auter, ve lascion a voi l bel de la descorida.

Elisa ruarà ence a Moena per prejentar so liber, ai 20 de aost, tel cader de la rassegna de Moena Incontri, endana chi che lo vel pel l comprar ence sui canai de vendite online.

De più su La Usc stampèda de en vender ai 27 de jugn del 2025.  (Monica Cigolla)