La Usc di Ladins

La Provinzia de Balsan á mené fora le comunicat stampa dales 12:10, y intratan án bele ciafé la pröma cercia ince tla Val Badia. Chësta jöbia ai 26 de jügn domisdé röiel adalerch te Südtirol n frunt de temporai, acompagné da vënt sterch y ince granijores. Aladô dl zënter de competënza provinzial, pól porchël ince gní a s’al dé alüsc smöies y movimënc de tera. Le livel de atenziun é ghel. Y ghel él ince por ega alta, che podess gní a s’al dé te Puster y tl raiun da Porsenú. I temporai mët bele man tl pröm domisdé y se tirará inant cina ite tla sëra. Intratan él bele gnü les prömes granijores tl’alta Val Badia, danter La Val y Badia. Y sciöche an les â bele odüdes la ultima sabeda a San Ciascian, éseres ince en chësc iade valgamia granes, sciöche la foto a desmostra. L’invit é chël da se tigní informá ince sön i canai dla Provinzia y les previjiuns dl tëmp. Bele en lönesc án odü tan snel che ara pó jí. Danter San Martin y Mareo ál basté püc momënc de gran vënt, por fá raité jö lëgns sëc sön la strada dla Val Badia y ince söla strada danter Longega y Al Plan.  (pablo)