La Usc di Ladins

L é stat na bela marevea per Gilberto Volcan, chela che l à abù l met de veder enstadì. Volcan l laora tel Parch Natural de Panevelge e l é n espert de besties, apede che president del Grop da Mont Cai Sat de Moena.

Chisc dis passé tel Lèch de Sèn Pelegrin l à vedù na picola familia che l é dassen na neva per nesc lesc da mont: na familia de folaghes (Fulica atra) con 3 ponjins, nasciui da pec dis.

Volcan ne à segnalà l event, che l é enteressant ajache chesta che l à documentà l é la pruma nidificazion de semper te Fascia de chesta sort de ucel.

La folaga (Volcan ne à dit che vin Gherdena i ge disc plasët, ma no resulta che sie n inom fascian, apontin ajache no l é na sort da chiò) se pel la veder sorì tel Trentin e te la Tèlia, ma per solit la stèsc te leghes più en bas sul livel del mèr, e te Fascia la é stata veduda demò, e da chièr, endèna la migrazions.

Ge dijon n bel develpai a Gilberto Volcan per chesta neva curiousa e enteressanta e per i doi bie retrac che l ne à manà.

Su La Usc nr 26 dai 11 de messèl, che se pel troèr ence te la boteighes de sfoes de la valèdes ladines.  (LG)