La Usc di Ladins

Ai 22 de messèl l calandèr ne disc che l é Sènta Maria Madalena, la sènta che la stèsc sora l paisc de Mazin. Chest an tel paisc fascian la sègra é stata metuda a jir en domenia ai 20, con na bela zelebrazion te la picola gejia. A ofizièr la messa grana, viventèda dal Cor de gejia de Pera sun ciantoria, l é stat don Andrea, che no l à volù mencèr a chesta sègra te sia picola parochia, soraldut ades che l à sapù che chest uton l se n jirà da Fascia per portèr inant sia miscion utró. Sun utèr apede el l era don Fabio, che a Mazin d'istà l é na prejenza oramai cognosciuda, e apede ju utèr la bandiera de la Musega Auta Fascia, col bandieral e president Franz Mazzel e na raprejentanza del Comun.
Don Andrea à rejonà de la fegura de Maria Madalena, chiamèda »la apostola di apostoi« ajache l é stat anter la prumes, fosc proprio la pruma, a veder Gejù ressort e a ge portèr ai etres apostoi la neva più straordenèra del cristianeisem. 
L é bel pissèr che per portèr chest gran messaje sie stat cernù na femena. E doi femenes l é ence la protagonistes del Vangele de chel dì, la sores Marta e Maria.

Se pel lejer dut su La Usc nr 28 dai 25 de messèl: sul sfoi stampà che se pel troèr ence te la boteighes de sfoes de la valèdes ladines o sul pdf per i aboné al e-paper.

 (LG)