La Usc di Ladins

Maria Piccolin, stata per egn bibliotecaria de Moena, ma soraldut cognosciuda per sia gran pascion per la storia e la enrescides, à ciapà enstadì l recognosciment da man de la Magnifica Comunità de Fiem. Ai 14 de messèl defat la Magnifica à zelebrà la pruma edizion de la Giornèda di Meric de Comunità, n event dedicà a chi che à sapù vardèr via la memoria, valorisèr l teritorie e sostegnir i valores de la val. La data cernuda la recorda i Pac Gebardini del 1111, at simbolich che ge à dat l’autonomia a nesc teritories e che amò aldidanché segna l troi de la Magnifica. A consegnèr i recognoscimenc l é stat l Scarie Mauro Gilmozzi che à sotlineà l segnificat storich e zivil de chest event. A Maria Piccolin, pruma regolana femena de la Magnifica, ge é stat consegnà la Targa al Merit di Studies. Apede ela ence autra persones desche Enrico Cavada, Giovanni ‘Vanni’ Defrancesco, Mario Felicetti e Myriam ‘Lella’ Betti Pederiva vedova de Celestino Pederiva da Soraga. En chel dì la Magnifica à ence consegnà la Targa a la Memoria a Arturo Boninsegna, Candido Degiampietro, Tarcisio Gilmozzi e Raffele Zancanella.

 (MCI)