La Usc di Ladins

Vigni mercol d'istà, tel chèder de la vijites vidèdes endrezèdes da la Comiscion cultura de la parochies de Fascia, l president de l'Union di Ladins Fernando Brunel l pea via inant mesdì da Vich e l mena sun Ciaslir la jent che vel jir a veder e cognoscer mingol de storia, i lesc, l'èrt e la devozion di fascegn.

Sun Ciaslir, defat, l é l veior santuarie de la Patrona de Fascia, Sènt'Ugèna: n unicum tant a livel storich che artistich.

En jebia ai 31 de messèl Fernando l é ruà te noscia redazion e con emozion l ne à contà che l dì dant, en mercol ai 30, l é peà via desche semper e ensema con el e con Carla Lorenz de Boret, che la é do a se fèr ite te chest servije, l era amancol na carantina de persones.

Con gran marevea Fernando à vedù che tel grop en vijita al Santuarie de Sènt'Ugèna l era ence na delegazion di maores raprejentanc de la Diozesa de Busan/Persenon, con l Piscop Ivo Muser, l vicare general siur Eugen Runggaldier che l é da Gherdena, l canonich del Dom de Persenon siur Ulrich Fistill, che l é de naa badiot da La Ila e l regent del Seminar da Persenon siur Markus Moling, che l é da San Scimun enlongia Bornech ma ence el à reijes ladines e l rejona ence ladin.

De più su La Usc stampèda de en vender ai 8 de aost del 2025  (LG)