La Usc di Ladins

Dut »Kostner« ie i inuemes di atlec y dla atletes unerei n vënderdi dl’ena passeda a Urtijëi. Ntëur la trëi domes­dì iel dan l tunel dla Curta, sun l troi dla ferata, stat la inaudazion ufiziela de na tofla nueva che ie śën da udëi propi iló, na tofla uluda dala Provinzia y metuda su n cunlaurazion cun l VSS y l CONI. Sun la tofla iel da liejer i inuemes dla doi zitadines de Urtijëi che se à fat unëur tl ciamp dl sport vencian nce bedaies olimpi­ches: Isolde Kostner y Carolina Ko­stner.

La schiadëura Isolde Ko­stner à venciù bën trëi bedaies pra la Olimpiades: una de arjënt pra la Olimpiades dl 2002 a Salt Lake City tla libra y doves de bront tl 1994 a Lillehammer tla Norvegia, tla libra y tl super-G. Na bedaia de bront à nce venciù si jurmana, la jadinadëura Carolina Kostner, pra la Olimpiades de Sotschi tla Ruscia tl 2014.

De chësta tofles nen saràl da udëi nce te d’autri Chemuns de Sud­tirol: de ndut nen àn lascià fé 32, per i 32 Chemuns che à l merit de avëi danter si zitadins nce vel’ un o vel’autra che à venciù bedaies pra la Olimpiades.

A Urtijëi àn n ucajion dla inaugu­razion nce ulù uneré l atlet de pudejé Tobia Kostner. L jëunn de Urtijëi ova venciù trëi bedaies pra la Special Olympics dl 2017

Elisabeth Kostner

L articul ntier tla edizion nueva de La Usc di Ladins de n vënderdi ai 29 de agost.