La Usc di Ladins

Co se pelel meter ensema acolienza, sostegnibilità e davegnir de la comunanzes da mont? L é stat l argoment zentrèl de la scontrèda de la SAT de enstadì tel Palaz de la Magnifica Comunità de Ciavaleis, per anunzièr l congres anuèl che sarà ai 18 e 19 de otober a San Lorenzo Dorsino sul tem: ‘la capazità de cèria turistica di teritories da mont’.

Te la pruma pèrt del convegn l é stat n confront anter Christian Girardi e Enrico Miorelli de Trentino Marketing, Michil Costa hotelier e president de la Maratona dles Dolomites e Walter Nicoletti president de le Acli del Trentin. Da la discuscion l é vegnù fora n messaje chièr: i dac l é n strument essenzièl per jir sorafora la logica del ‘per mie cont’ e orientèr a na vida ascorta l svilup turistich.

Sul pian culturèl Michil Costa à metù al luster l mudament del turism alpin da n ‘mond toron’ fat de armonia e autentizità, a n ‘mond cadrat’ dominà dal consumism: »Duc sion do che vivon l passaje da n mond toron - à dit Costa - olache l om vivea en armonia con la natura e de gra a na ospitalità sćiantiva, a n mond cadrat fat de consumism. L’industria turistica à mudà l’acolienza sćiantiva te business. Ades l é fort l besegn de jir deretorn, de fèr sceltes autentiches per doventèr endodanef più ‘torons’, col sostegnir l vero enconter con l ghest.«

Dut l articol su La Usc stampèda de en vender ai 3 de otober del 2025  (MCI)