La Usc di Ladins

Dut intorn a nos aon films e video. I pel esser èrt o reclam, su la televijion, su internet, te la memoria de nosc fonin, al chino… Tor ju zeche e l moscèr te n video l é una de la vides più sorides per fèr passèr n messaje, per tor ite e ‘fermèr’, te na opera fata dal om, l mond entriech. E se te la vita da duc i dis de noscia valèdes se rejona, se se bega, se laora, se cianta, se peissa per ladin, perché pa n film no podessel moscèr ence chest aspet de la vita?
Se per scriver na poejia, o na contia, bèsta aer n sfoi e na biro, n film, ence se scempie e curt, l à de besegn de più èrc e abilitèdes tecniches. Realisèr na idea l é più senester tel ambit cinematografich che te chel de l’autra formes de èrt.

Per chest la Coprativa sozièla Inout, de gra al finanziament de la region Trentin Sudtirol e al didament del Istitut Cultural Ladin Majon di fascegn, se à pissà de meter su L Cucarel, n concors cinematografich con doi pesć (da 5.000 euro e 4.000 euro) per realisèr filmes per ladin. L zil del projet l é chel de ge dèr sostegn e sbunf a la produzion cinematografica te nosc lengaz de mendranza e de ge dèr l met ai creatives de noscia valèdes de fèr dalbon zeche che autramenter i aessa stentà a realisèr.

No l é senester tor pèrt al Cucarel. L é besegn soraldut de na idea per n curt film (no sora i 30 menuc) olache se rejone per ladin (una de la cinch variantes del ladin del Sela: fascian, gherdenèr, badiot, fodom, ampezan). L film l pel esser de ogne sort: l pel contèr na contia enventèda, esser n documentarie, n film de animazion…

Se te es pascionà de cinema o te ès na idea per n film, L Cucarel l speta tia proponeta! Se te cognosces zachèi che podessa esser enteressà al pest, rejonege de L Cucarel. Dà tie contribut per slarièr l mond del cinema per ladin! L é temp fin ai 31 de otober per tor pèrt al concors.

Per duta la informazions va su www.inoutfassa.com/cucarel o scrif na mail a cucarel@inoutfassa.com

Duta la informazions su La Usc stampèda de en vender ai 3 de otober del 2025


 (Tita Dorich)