La Usc di Ladins

Can aede tacà a lurèr te Istitut Cultural Ladin?
É tacà del 1996 con n contrat per meter ite tesć per ladin te la banca dac. Chel an l é vegnù fora l concors per assistent aministratif, gio en verità no voleve l far, aeve fat da pech l concors per polins a Moena. L era chel moment che voleve jir a studiar Scienze de l’educazion percheche aeve cognosciù don Gigi Vian e aesse volù me laurear e jir a lurar con el te comunità. L concors al Istitut Cultural Ladin l é fat, spenta ence da mie mare che me dijeva che l é miec star daite che sot la pievia. Endana aeve venciù l concors de polina e al ICL ere ruada seconda. Chel dì che i me à chiamà dal Comun de Moena per me domanar le mesure de la devisa da polina, dalmesdì me é ruà la racomanada dal ICL, i me dijeva che ajache la persona che aea venciù l concors la se n jiva percheche l’aeva ciapà n auter post, aesse podù jir su a lurar. Al scomenz no voleve percheche aeve tel ciaf de far n laor demò te sajon e fora de sajon star a ciasa a studiar, ma a la fin é azetà. É tacà l prum de jené del 1997, l era Fabio Chiocchetti diretor, Pino Bernard te ragioneria, Nadia Valeruz te segreteria, Stefen Dell’Antonio Monech te biblioteca e Alessio Deluca informatich.

Che ve recordède de chi prumes egn?
Gio laorave jubas, me cruziave de l’aministrazion, del economat, ge dajeve na man ogne tant a Nadia te segreteria, l era bel, se fajeva tante scomenzadive e convegnes. Me recorde che l nef Museo amò no l era e aon lurà per l verjer. Me recorde con piajer de n muie de jent che à fat trop per l Istitut e che à lascià pedie fone: Guntram Plangg, Cesare Poppi, Ulriche Kindl, dut persone de saer e carismatiche. Gio ere encantada da ic ajache me à semper piajù de più l aspet cultural. É abù la fortuna de cognoscer Pare Frumenzio Ghetta, a el ge é stat dedicà la biblioteca.

Se pel lejer duta l'intervista su La Usc nr 44 dai 14 de november, che se pel troèr ence te la boteighes de sfoes. Sul sit www.lausc.it se per fèr l abonament al e-paper per aer azes vigni vender a dut l sfoi sul fonin, tablet o computer.


 (Monica Cigolla)