La Usc di Ladins

Te na radunanza dassen delicata ansera, jebia ai 5 de firé, i sozi del Ski Team Fascia ge à confermà piena fiduzia al president Lorenzo Cemin, a la tesoriera Alessia Daprà e a dut l diretif. 
La radunanza é stata chiamèda ite con n orden del dì dassen pesoch, che ge domanèa ai sozi de se pronunzièr su la dezijion del Consei diretif de parèr fora dal Ski Team l ex vizepresident, avocat Marco Franco, e te n auter pont al orden del dì, su domana del medemo ex vizepresident, che i sozi lite per ge tor demez la fiduzia al president, a la tesoriera e a dut l diretif.
Duta la situazion é stata deschiarida dantfora dal avocat Simone Cecchin, coleà tras web: na costion pesoca, che à ence implicazions legales per la denunzies del veie ex vizepresident. Do n confront olache i componenc del diretif ge à responet a la domanes di sozi, prejenc en gran numer, l é stat la litazions e duc a una i à lità per tor fora da la sociazion l ex vizepresident e per ge confermèr enveze piena fiduzia al president e a dut l diretif.
L president e dut l diretif i à rejonà del lurier che vegn portà inant dì per dì per endrezèr l'atività de na sociazion che à endò scomenzà a crescer, i à rengrazià i sozi per la stima e i à dit che i volessa poder lurèr en serenità per l ben de nesc joegn, enveze che cogner se cruzièr de chesta sort de problemes.

Podarede lejer maores detaes su La Usc stampèda de en vender ai 13 de firé.

 (Lucia Gross)