La Usc di Ladins

L é n percors fat con de gran tabeles con scric, documenc e retrac, rencurà da la Fondazion Museo storico del Trentin con sie diretor Giuseppe Ferrandi e l à desche obietif ge fèr cognoscer a la popolazion de dut l Trentin la reijes e la storia de sia autonomia. Chest alestiment, inaudà e metù fora l istà passà a Trent, l à per titol »Autonomia. La volontà del popol é lege«, l revèrda en particolèr i egn de la revendicazion autonomista dal 1945 al 1948 e l fèsc pèrt de la rassegna »Autonomia. Il cammino della comunità trentina« voluda dal assessorat a la promozion e cognoscenza de l'autonomia de la PAT, vidà da Simone Marchiori.
Chesta esposizion vel fèr crescer cognoscenza e consaputa sun n moment storich curt, ma rich de fermenc che à abù gran emportanza per l davegnir de noscia provinzia e per l recognosciment de sia autonomia. La resta fora te Comun de Sèn Jan fin ai 9 de oril ti oraries che l é avert i ofizies del Comun; dapò l é en previjion che per chierir de tor ite ence i più joegn la vegne portèda endò te val, a la leta de la scoles, via per l meis de mé.

Podede lejer dut su La Usc dai 3 de oril da ciapèr te la boteighes de sfoes de la valèdes ladines o tras abonament (info:www.lausc.it/abo o abo e-paper)


 (LG)