La Usc di Ladins

Anter i 25 e i 27 de mé l’APRIE, l’agenzia provinzièla de la ressorses idriches e de l’energia, l’à endrezà te Fascia n emportant convegn internazionèl, con esperc da duta Europa, dedicà ai temes de l’energia e, più avisa, a la Comunitèdes energetiches. L convegn l é stat ocajion de fona reflescions su la fersa costion energetica globèla e ence per fèr n bilanz sul projet EcoEmpower, che ti meisc anter setember 2023 e aost 2026 l à metù adum desferenc partner europeans che se cruzia de energia te si raions, con chela de ruèr a sensibilisèr a na vida percacenta neves teritories su la costions energetiches e smaorèr la produzion de energia sostegnibola, très la realisazion de neva Comunitèdes energetiches.
A serèr su l projet EcoEmpower l’APRIE, con si referenc Massimo Plazzer e Luca Pasquali, l’à volù portèr esperc internazionèi te Fascia, post de segnificat per chel che revèrda i studies energetics del grop de lurier, ajache apontin te la val de la Veisc l é stat metù a jir la pruma comunità energetica scolastica de duta Europa, che ge dèsc responsabilità e luster ai joegn e che vel esser strument e spazie per fèr dalbon comunanza sul teritorie.
L’idea de CESLA, la Comunità energetica de la Scola Ladina e de l’Asilo, la é nasciuda acà trei egn de gra al empegn e al lurier del grop de robotica Gome Neve di licees fascegn. I studenc, ensema al dozent Thomas Zulian, i aea portà dant l projet de Cesla a la competizion de la First Lego League 2023, desche ejempie de valuta per na doura più percacenta de la lum prodota sul teritorie très fontènes renovaboles desche l’èga e l soreie. Do aer concostà nonzech e gran aprijiament, i joegn ideatores de Cesla i à volù jir inant col projet e ruèr a na efetiva realisazion de la Comunità energetica.

Podede lejer dut su La Usc stampèda dai 12 de jugn da ciapèr te la boteighes de sfoes de la valèdes ladines o tras abonament (info:www.lausc.it/abo o abo e-paper)


 (Thomas Zulian)