La Usc di Ladins

Na delegazione da l'Istria é ruèda chisc dis passé te nosc raion. En sabeda ai 14 de jugn la vizepresidenta de la Region Istriana Jessica Acquavita e i assessores regionèi Tea Batel e Vladimir Torbica é rué te Fascia compagné da Cristina de Tisi del Servije Mendranzes de Trent e i à podù vijitèr l Museo Ladin vidé da la diretora del Istitut Sabrina Rasom, che la ge à prejentà i contegnui de la sales espositives e la i à metui en consaputa de la storia, la tradizions, l lengaz e la carateristiches di ladins. Na scontrèda de gran enteres per la delegazion, che volessa poder endrezèr n museo ence per sia comunanza.

En lunesc ai 15 de jugn l é stat la scontrèda istituzionèla a Trent: a ge dèr l benvegnù te la Sala Belli del palaz de la Provinzia l é stat l assessor Simone Marchiori, ensema a la componentes del Servije Mendranzes PAT con la dirigenta Elisabetta Sovilla e a desvalives esponenc de la trei mendranzes storiches recognosciudes tel Trentin: mochegn, zimbres e ladins. La comunanza de Fascia era raprejentèda dal Conseier de procura a la cultura ladina Bernardino Chiocchetti, da la vizepresidenta del Consei General e presidenta del Istitut Cultural Ladin Tea Dezulian e da la diretora Sabrina Rasom. Prejenc ence i componenc de l'Autorità per la mendranzes Chiara Pallaoro e Matteo Nicolussi Castellan, da pech lità ombolt de Luserna.
Marchiori à rejonà de na ocajion emportanta per meter a confront l model de stravardament linguistich anter lesc de confin desferenc, segné dai avenimenc storics.
La scontrèda é jita inant con na meisa torona di raprejentanc de la istituzions aministratives e culturèles de la mendranzes de la Provinzia e la se à serà su domesdì con na vijita de la delegazion a Palai en Bernstol/Palù del Fersina al Istitut Mochen e al Mèsc 'Filzerhof', per cognoscer sul teritorie ence vèlch de chesta mendranza.

Podede lejer dut su La Usc stampèda dai 19 de jugn da ciapèr te la boteighes de sfoes de la valèdes ladines o tras abonament (info:www.lausc.it/abo o abo e-paper)


 (Lucia Gross)