La Usc di Ladins

L é da passa diesc egn che don Mario Bravin rec la parochies de Cianacei e Dèlba: l cedean giust fossa stat de otober del an passà, ma apontin enlouta l é stat chiamà dal Piscop a se tor su na encèria maora, chela de responsabol de duta la parochies de Fascia. L uton passà l é stat donca la Val de sot a ge dèr l benvegnù e per chest la comunanza de Cianacei no à podù l festejèr, spetan de troèr n'autra ocajion per ge sporjer l detelpai per sie diesc egn de vejinanza e desponibilità.

L'ocajion é ruèda enstadì. Da pech se à sapù che don Mario te chest meis l fèsc 35 egn da preve: sia ordenazion era stata a Trent tel dì de festa del patron de la Diozesa, Sèn Vile, ai 26 de jugn del 1991. L Comitat parochial de Cianacei, col endrez de Giuseppina Rizzi à pissà donca che chesta sie la outa bona per ge fèr mingol de festa e l à cernù desche data en domenia ai 14 de jugn, ajache per la festa del Sacro Cher de Gejù, patron de la gejia de Cianacei.
En domenia donca te la messa grana l é stat let ju na orazion di fidei dedichèda al cedean religious de don Mario e a la fin de la zelebrazion l é stat fat desche da tradizion la procescion: la gran statua del Sacro Cher de Gejù che l é te gejia é stata portèda sul cèr fornì de fiores, fora per strèda Roma fin ló dal Comun e deretorn, compagnèda da duc i componenc del servije liturgich, da la Musega Auta Fascia, dal Grop de Folclor e da la comunanza.

Podede lejer dut su La Usc stampèda dai 19 de jugn da ciapèr te la boteighes de sfoes de la valèdes ladines o tras abonament (info:www.lausc.it/abo o abo e-paper)


 (LG)