La Usc di Ladins

Taca ite la sajon da d’istà e con chesta se smaora ence l lurier di Polins de Fascia. Aon fat cater ciacoles con Gianluca Ruggiero, l Comandant di Polins de la gestion sozièda de Fascia, che col prum de jené del 2025 no tol più ite l Comun de Sèn Jan.

Cotenc siede per chesta neva sajon da d’istà?

Gianluca Ruggiero Sion de 16 operatores anter chi de ruol e chi a temp determinà, se spartion su anter la Val de sot e donca Moena e Soraga e la Val de sora donca Mazin, Ciampedel e Cianacei. Sion fortunè percheche aon troà duc i operatores per l istà, l é semper più senester troar polins.

Che istà ve spetède?

Per chest istà se conzentreron soraldut su la viabilità sun stradon. Tegneron doi ofizies averc al publich da doman bonora, a Moena e a Cianacé, per dar n servije e per esser a la leta tel cajo de autorisazion, boi o chel che l é de besogn. Se speton n istà endò con n mulge de jent e n mulge de manifestazion, aon tanche ciapà l program che l é belebon rich e donca sarà da far servije ence do le 7 da sera per tropes dì con nosce patulie.

Sentide che mencia i Polins del zenter Fascia?

Ei, l é normal sentir che mencia l anel de coleament anter auta e bassa val. Aboncont l é amò jent che no à capì chesta spartijon, sozede de spes che i chiama chigiò te Comando de Moena per valch problem o per n intervent e i ne domana de jir sul post. L é amò ence sentadign de la val che i ne scrif che ti autres paesc sion semper prejenc e magari a Vich no sion mai. Gé capisce che a Sèn Jan i é de pec e daperdut no i pol ruar. Gé spere semper che se rue endodanef duc ensema.

Podede lejer dut su La Usc stampèda dai 19 de jugn da ciapèr te la boteighes de sfoes de la valèdes ladines o tras abonament (info:www.lausc.it/abo o abo e-paper)  (Monica Cigolla)