La Usc di Ladins

Da chest istà sui jouves, troes e lesc da mont sarà doi neva persones a la leta di ghesć, per ge dèr informazions e ge fèr cognoscer la belezes del teritorie. L é n projet de l’ApT de Fascia che à tout su doi ‘ranger’, na encèria inovativa e strategica, pissèda per miorèr l’acolienza e l’esperienza di turisć via per i meisc de maor turism. Se trata de Carolina Chenetti da Moena e Marco Mazzel da Cianacei.
I doi ranger jirà soraldut sui cinch jouves de Sela, Pordoi, Fedaa, Ciareja e Sèn Pelegrin e te vèlch post olache l é semper n muie de jent desche Fuciada, Duron e Mont de Poza. Se podarà i cognoscer fora per sie guant vert e i sarà a la leta per ge dèr informazions e consees ai vijitadores, per cerner i posć e i troes giusć aldò de sia capazitèdes. Apede a l’atività de acolienza e assistenza, i vardians arà ence na funzion de presidie e monitoraje ambientèl.

L é fascian ence l ranger che controla l lech de Ciareja. L é Giorgio Poschiavin da Moena, l é stat tout su da l’Azienda de promozion turistica de la Val d’Ega. Poschiavin l stèsc dintorn l lech, l dèsc fora informazions e soraldut l controla che la jent aesse comportamenc aldò per presservèr un di posć più da marevea olache rua jent da dut l mond per ge vardèr ai bie colores del lech e de la natura dintornvia.

Podede lejer dut su La Usc stampèda dai 19 de jugn da ciapèr te la boteighes de sfoes de la valèdes ladines o tras abonament (info:www.lausc.it/abo o abo e-paper)  (MCI)