La Usc di Ladins

Ogne doi meisc presciapech sui canai social de la Coprativa de Fascia vegn fora n nef video che ne ciapa l eie. L é jent de conta, che recorda, vita e lurier leé a chesta azienda e a la comunanza. L é n projet che fèsc pèrt de la scomenzadives che la Coprativa de Fascia à endrezà per recordèr l cedean di 130 egn de storia, che é tachèda ite belapontin del 1896. De chest e de auter aon rejonà con Elena Pitolini del ofize marketing del Fassa Coop.

Co éla nasciuda l’idea di video?

Elena Pitolini Dut l é nasciù con l estro de jir a veder che che l era la Coprativa dant de ades. Per festejar chisc 130 egn cognaane jir en do. Per grazia aon troà n picol archivie con documenc e retrac veies, no l era nia de ordenà e metù via, ma pojà aló, te n armer. Canche aon tacà a vardar fora chisc papieres se aon dit: »bel, ma ne mencia zeche da contar«. Se aon pissà coscita de far l projet di video, che publicon via per dut l an. Aon tacà col prum sobito do la radunanza, aon domanà fora Ester Cincelli, dapò aon tout su Bruno Ghetta e Mariagrazia Anzelini, chisc meisc che vegn vegnarà fora chi con Beatrice e Federico Zanet, Alfredo Weiss e Lucilla Locatin. Jir da la jent ne à permetù de cognoscer na part de storia descognosciuda dai più joegn, noi defat no saeane nia de coche l era i prumes egn.

Con chest projet aede tout pèrt ence a Archivissima…

Ei, voleane far n projet ensema al Istitut Cultural Ladin con la diretora Sabrina Rasom che la é semper n muie desponibola con noi e noi con ela. L tem de Archivissima de chest an l era ‘Quello che non c’è’ e ajache aon chesta sort de archivie che no l é complet, chest argoment jia proprio ben per noi e nosc projet. Te chela scontrada gio e Mattia Desilvestro, che ge aon lurà do a dut l projet, aon fat na curta introduzion su la Coprativa, da canche la é nasciuda a olache la é ruada. Mattia l à fat na gran enrescida ti archivies del ICL, soraldut di egn do l 1952 canche i à metù su le filiale, l à cerì fora ence che che sozedea te Fascia te chel moment e l à fat na lingia de post de confront sui social per ge dar n contest storich. En ocajion de Archivissima te Istitut Ladin aon moscià n picol video con le prume trei interviste a la jent fate da Alessia Bernardi

Podede lejer dut su La Usc stampèda dai 19 de jugn da ciapèr te la boteighes de sfoes de la valèdes ladines o tras abonament (info:www.lausc.it/abo o abo e-paper)  (Monica Cigolla)