La Usc di Ladins

»I morc sul lurier l é na ferida per duta la comunità e cogn esser n armoniment a do a do per istituzions e pèrts sozièles«. Lo à dit l president de la Republica Sergio Mattarella te n messaje envià enstadì a la presidenta de la Comiscion parlamentèra de enrescida su la condizions del lurier te la Tèlia Chiara Gribaudo. L president Mattarella l é entervegnù ai 18 de jugn a la prejentazion de la relazion de la Comiscion su la tragedia de Casteldaccia stata de mé del 2024 olache l é mort 5 lurieranc. 
Sul lurier se seghita a morir. Te la Tèlia la media é de presciapech 3 morc al dì, passa mile ogne an. Tel Trentin Südtirol del 2025 l é stat 21 vitimes, 14 tel Südtirol e 7 tel Trentin. I infortunies sul lurier tel Trentin se smendra ma i é amò auc: del 2025 i é stac 8.958, l 3,9% de manco che del 2024.

Per seghitèr a fèr sensibilisazion e chierir de smendrèr i infortunies sul lurier, ai 24 de mé del 2025 l é jit en doura la neva Cordanza Stat Regions su la formazion per la sanità e la segureza sul lurier. Chesta cordanza à pervedù n trat de temp transitorie de 12 meisc per consentir che duc se mete en regola aldò de la neva desposizions e donca coi 24 de mé de chest an duta la neves é doventèdes obligatories. Chesta cordanza é stata fata con chela de unifichèr e fèr a na vida che sie più efizienta la formazion su la segureza. Colunes él la maor neves? Aon rejonà con Tiziana Pini che da 10 egn la laora te chest setor e la fèsc corsc de formazion per la segureza sul lurier.



Podede lejer dut su La Usc stampèda dai 26 de jugn da ciapèr te la boteighes de sfoes de la valèdes ladines o tras abonament (info:www.lausc.it/abo o abo e-paper)



 (Monica Cigolla)