La Usc di Ladins

La Risola del Pian di Joegn de Fascia la taca endò a śirèr, per ge dèr sbunf al teritorie con de neva e curiousa scomenzadives outes ai joegn fascegn. Aldò di regolamenc e de la diretives del avis de concors manà fora l’aisciuda passèda dal Pian di Joegn del Comun General, te chesta pruma fasa un soul projet à passà fora la selezions e l pel esser metù a jir: l à inom »Dadoi« e l à desche tem i jeghes da desch. L’autra proponetes che l é stat manà ite, per costion tecniches o de contegnù, no les à abù l’aproazion da man del Desch de La Risola e no les à ciapà finanziamenc per sia realisazion. Aboncont do l istà La Risola e duc i joegn che colabora col Desch i portarà dant de neva idees e scomenzadives, che podarà viventèr l uton con corsc de formazion e evenc de valuta, con chela de scorlèr su l ambient fascian e soscedèr colaborazions e gaissa.

Donca endèna taca via l projet »Dadoi«, portà dant dai joegn Marco Castelnuovo e Tiziano Defrancesco col didament de la Coprativa sozièla Inout, che à chela de meter adum n grop de joegn bogn de endrezèr e meter a jir de bela scontrèdes olache la jent posse se mateèr coi jeghes da desch. I dadoi se i tira cardan te la fortuna canche se jia con n muion de jeghes; ma »da doi… en su« vel esser ence n envit a se troèr de n muie per passèr de bie momenc de devertiment, per passèr vèlch ora ensema, a na vida sèna e gustegola, zenza de gran tecnologies.


Podede lejer dut su La Usc stampèda dai 17 de messèl da ciapèr te la boteighes de sfoes de la valèdes ladines o tras abonament (info:www.lausc.it/abo o abo e-paper)


 (Thomas Zulian)