La Usc di Ladins

»Sion rué a l’esasperazion – disc Jacopo Bernard, patron del refuge Valacia e gestor del refuge Ciampedie. Chest an l é amò piec che i autres egn, se no i ciapa duc i servijes i se lamenta. I rua sa mont, i ordena da magnar, i ge fasc na foto e i la met sui social, e magari i lascia ence ló la roba te piat, i é doventé duc influencer e l é doventà dut ‘instagramabol’. Anché i é te Fascia, doman sul Padon, l dì do sun Lagazuoi e amò do su le Tofane. Olà éla do che la va la mont? Fosc sion noi che falon a dar na idea desferenta.«
L é chest l pensier de n refugist, joen ma che vegn da na familia de jent da mont.
»L problem l é che l turism da mont l é mudà n muie en prescia. L é doventà, te valch post, n turism de massa che perten de troar i medemi servijes che se troa te val. Te Fascia l é 44 refuges – spiega Jacopo – valch un à cernù de ge sporjer dut chel che la jent domana per sie benstar, noi aon cernù de restar na utia da mont, no é nia de contra a cheste scelte. Ma noi no volon mudar la mont te chest. L é lesc che no pel, e fosc no cogn, se adatar a n turism svelto e che perten semper de più. La mont à si tempes, soe dificoltà, si momenc de acort, soa beleza. E a oute ence valch privazion fasc part de l’esperienza.«

Mencia èga e i ghesć se lamenta che no i pel se fèr la docia

N auter problem che auza fora Jacopo Bernard l é la mencianza de èga. »Chest an l é stat l prum invern che aon abù demò 60 zentimetres de neif fora dal refuge Valacia, i autres egn se n binaa ence 1,80 metres. L é ence l prum an che no aon abù l picol lach de aga de fora che per solit l restaa fin a la metà de jugn. Ajache mencia aga no podon la dar ai ghesć per far la docia e coscita i se lamenta, no i capesc che l’aga te n refuge l é n ben prezious che no se pel petar demez.
Vardon ben segur de garantir i servijes essenziai, ma no voi far vegnir l elicoter a me portar aga percheche i ghesć posse se far la docia, me sà na contradizion. No él aga? I cogn l capir, sion sa mont.«

De più su La Usc stampèda de en vender ai 28 de aost del 2026



 (Monica Cigolla)