La Usc di Ladins

Jon inant con nosc diarie. Fegurave che, schèji ogne dotrei dis nosc autor scrif ghenao chel che ge capitèa (ma per via de la lèrga no podon scriver dut cant). Nosc Tita vigni dì no l sà se l indoman l sarà de ca o de là, vif o mort.

Amò sul front…

De aost del 1916 l vegn manà te ospedèl percheche l à mèl a la giames. Te sia cambra l era n auter sudà, bon sech »come nostro Signore in croce«. L vaèa dal mèl, purampò l dotor no podea l manèr a cèsa percheche no l aea la fiora. Coi 26 de aost, Tita l stèsc miec e l é endò con sia compagnia, en resserva, a comedèr strèdes e a endrezèr baraches per l invern.

Na dì i ciapa doi sudé rusc che sciampèa: un i lo maza sobito e l auter i lo toca te la giames. I lo à portà te ospedèl per l curèr, ma tinultima i lo à giustizià listesc (roba che, l vegn a saer, no i aessa podù fèr, i aessa cognù l manèr te tribunal de giustizia). L conta amò che na dì l é ruà sul front n Feldvater, l aea inom Gasser e l era da Persenon. L vegn a i benedir e a ge dèr confort. Ai 20 de otober del ’16 l fioca de pien: i »Santi ufficiali« i é daite a dormir te pric, i sudé i cogn stèr defora e i proa a se parèr dal freit con vèlch cuerta. L indoman de 7 o 8 i à i piesc giacé e i vegn mané te ospedèl.

Ai 27 l ciapa la licenza e l ponta demez per jir a Trent, olache l dorm su na banca te Piaz Dante. Fin ai 13 de november l stèsc a cèsa, l indoman l va sun Sela, l rua ju a La Chiusa e l dorm jun Busan al alberch Riesen. L va a troèr sia cugnèda Rosina Sottsass badiota che la stèsc a Eggerhof. I dis che vegn con sia compagnia l é endodanef sul Pasubio, olache vegn de gran fiochèdes via per l invern.

Podede lejer duc i recorc su La Usc stampèda de en vender ai 28 de aost del 2026




 (Nicoletta Riz)