La Usc di Ladins

L titol l é »L’ultima sonata« e l é l ultim liber scrit da Marika Bernard e Barbara Bolzan. Marika la cognoscion ben, l é ‘na fantastica creatura con la gran pascion de lejer e scriver’ i à dit de ela si peconc. Nos l’aane intervistèda del 2024 canche l era vegnù fora sie liber dal titol »L’egoismo di un amore«. Ere jita a la troèr te la Comunità alberch »N bel Soreje« a Sèn Jan olache la stèsc e aló la me aea avert sie cher e sie mond.

Ades l é sun desch n’autra sia produzion, scrita a cater mans con sia mior amica Barbara Bolzan. En lunesc ai 24 de aost a La Gran Ciasa a Soraga, Loretta Pederiva, presidenta del Comitat manifestazions de Soraga e n muie leèda a Marika ajache la l’à veduda nascer e crescer, l’à endrezà la prejentazion. N moment intim, beleche na ciacolèda anter doi amiches.

»L é la storia de n amor malà – à contà Marika – che per defortuna la fenesc mal. Aon volù scriver chest liber per dir basta ai amores malé, basta a le storie de gelojia.«

Na storia che ciapa piata do piata, che ge dèsc ousc ai personajes, ma no demò, la ge dèsc n’ènema, n corp, na volontà, na vita.
Chi che é curiousc de lejer l nef liber de Marika pel la contatèr, la é ence sui social.

De più su La Usc stampèda de en vender ai 28 de aost del 2026


 (Monica Cigolla)