La Usc di Ladins

Do l bel suzes de la pruma edizion, i joegn de la Coprativa sozièla Inout peissa jà a la seconda. Rejonon del concors cinematografich L Cucarel che l an passà, sot la coordenazion del joen linguist fascian Tita Dorich, à vedù la partezipazion de 5 idees projetuèles.
Te chisc meisc la doi idees venjidores é do a doventèr realtà ajache i é do a fèr la ripreses con n muie de feguranc e atores ti teritories ladins. Tel meis de dezember i doi cortometrajes vegnarà moscé en antepruma al Kino de Cianacei e te chela medema sera vegnarà ence proclamà i venjidores de chesta seconda edizion, che dapò arà n an de temp per la produzion del film.
Su la piata www.inoutfassa.com/cucarel se pel troèr l bando de L Cucarel 2026 e duta la informazions del concors, endrezà da Nicolò Dorich, Anna Vasselai, Anna Lazzer e Jacopo Simoni, en colaborazion con la Coprativa sozièla Inout e con l Istitut Cultural Ladin Majon di Fascegn e l sostegn de la Region Trentin Sudtirol.
I projec cognarà vegnir mané ite dant dal prum de otober a la mail cucarel@inoutfassa.com e i vegnarà valuté da esperc del setor e dai diretores di Istituc Culturai Ladins de la valèdes del Sela. Apede al prum e al secondo pest per i miores projec, te chest 2026 L Cucarel vel ge dèr ousc e lèrga ence ai più joegn con n recognosciment spezièl per i Under 20. 

Duta la informazions su La Usc stampèda de en vender ai 28 de aost del 2026





 (MCI)