N laor de inressida su la situazion dei ladign

Data

05 de auril 2021

Galaria retrac

Grandeza scritura

riduci dimensione font aumenta la dimensione del font

Social

FacebookTwitterGoogle Bookmarks
Darè zent agn dal prim censiment dei ladign, n laor pèe via da la Provincia de Trent l à come obietif vede incia cala che l é la situazion de la ladinità nte le zinch vai intor al Sela. Chest l sarà de gran valor soraldut per Souramont
L diretor del Istitut Ladin Cesa de Jan Denni Dorigo »del Moro« l n’à fat savè che ntei mesc che ven vignarà fat incia a Souramont na inressida per zercé fora cuanta che l é la jent dei trei paisc che la se dichiara ladina. Se trata de na inressida sociolinguistica che é peada via da la Provincia Autonoma de Trent auna a l’università de Trent come inressida domà su le mendranze del Trentin (fasciagn, mocheni e cimbri), ma po s’à pensà – col interessament de la diretora del Istitut Majon di Fascegn Sabrina Rasom – che ava puoch senso fà sto laor domà sui ladign de la Val de Fascia ma l ava da ester slargé fora a dute e zinch le vai ladine. Cujì l é stat ciot ite ntel proget incia l Istitut Micurà de Rü e l Istitut Cesa de Jan, coi suoi diretor che farà part del grop de laor.
Sta inressida l vignarà fata ntei mesc che ven, co la forma de n cuestionario che ruarà nte le cese dei paisc: no l interessarà duta la popolazion ma domà n campion statistico per ogni fassa de età a na moda da podè avè n risultato che l se arvijine pi che se pol a la realtà senza che avè da fà l cuestionario a duc. L bel de la inressida l é che no la é stada pensada e no la ven fata domà per ció su i dac, che i sarà semper fondamentai per studié l argoment, ma soraldut parceche la siebe n pont da duorà come riferiment per le politiche del lengaz che le mudarà conforme i risultac che vignarà fora.
Per Souramont sta inressida la sarà fondamentale ajache darè vint agn dal laor »Survey Ladins« de Gabriele Iannàccaro e Vittorio Dell’Aquila, che l ava inressì fora l raporto anter la jent de la vai ladine e suo lengaz, vignarà iaro fat n cuader – per cuant no prezijo al zent per zent – de cuanc che descor ladin e de cuanc che se dichiara ladign nte ogni comun. L’intenzion l é de dà fora i cuestionari davan che scomenzé la sajon de d’istà, canche la situazion la é pi chieta, po i dac i vignarà cioi su e elaborai fora per l auton.
Sta inressida la tomà darè zent agn giusć dal censimento de la popolazion del Regno d’Italia dei 1 de dizembre del 1921, canche l governo l ava inconsentù a la jent de podè se dichiarà ladina, con percentuai dal 95% n su de jent che s’à dit ladina nte tanc de comugn: a dì l vero, somea che sta possibilità la siebe stada dada pi per paora che i ladign i se dighe todesch che per respet de le mendranze.
L é donca na bona ocajion per vede cala che l é la situazion de la ladinità e del sentiment ladin nte le zinch vai e soraldut a Souramont, chela che nte sto secolo a patì de pi a ester destacada da suoi fradiei e tacada inveze nte na provincia ulà che i ava saldi de manco da spartì. I resultac de sto laor sarà na bona nuova per se fà n idea de cala che pol ester davero la situazion ntei trei comugn, ulà che no puocia jent l à patì na zerta delujion ajache l liam con chele autre vai ladine l é da spes sentù debol e del referendum del 2007, che l eva nassù propio n vista de na riunificazion, no s’à pi sentù tant, o l é incia stat chi che po sun chel s’à mitù de travars.


Martino Pezzei