La Usc di Ladins

Davò la stagion »neigra« 2020 – 2021 che no n é mei piada via, el setór dei lifc, el da na iniezion de fiduzia ntel davignì turistich de la val con gròsc progéc en cantier, siébelo del viers de la promozion turistica che del miliorament del colegament con Malga Ciapela. Chëst forsci l element economich de plù gran enterésc sauté fora nte chëst 2021 encora segné da la pandemia.

Lifc sarei

Davánt en ann, come nte chisc dis, dut el setór del schi el spetáva en segnal da Roma per savei se podei pié via co la stagion. I numer de la pandemia no i eva bogn, con en auter numer de contagei, ospedei plens e encora deguna jent co la varola. La data ipotizada per giourì la vigniva sburlada tres plù ennavánt e depierpoi ence l’intenzion dei apascionei de volei toutné sui schi la se smendráva de setemana davò setemana. Na touta per el nès nten inviern co na mascia de nei che assa empemetù de sparagné na mucia de scioldi a fé nei artifiziala. Cánche ben emparáva che el 15 de fauré, data ultima davánt che no convegne plù empié segiovie e funivie, se pòbe pié via, puoce ore davánt el Ministro de la Sanité Speranza, con en at che sarà recordé come un dei plù ciari ejempli de encompetenza che la storia de la Republica Taliana recorde, el firmáva n’ordináza che saráva ence l’ultima porta. Sul Ministro pluovëva le, plù che dërte, proteste de dut el setór dai schi, con dut l indot dei maestri de schi, alberghi, boteighe e coscita ennavánt. Nte trope localité turistiche, ntra chëste ence a Reba, vigniva metù a jì flash – mob de protesta per damané che vegne delongo pervedù aiuc per la mont, coscita dassëna penalizada davò la sarada de merz del 2020. Diego De Battista descoráva ciaro de na decizion che »manciáva deldut de respét per la jent da mont« davòche duc, senza avei encora encassé en euro, i ava ence spenù scioldi per s’enjigné ca a fé pié via la stagion. Se scomenciáva a descore de »ristori«, ma da le prume notizie che ruáva da Roma su le modalité pervedude per i dé fora, i raprejentánc del setór i tiráva bele su del nes. Criters puoch ciari, disparité de tratament da śona a śona. Davò meisc e meisc de batalie da pert de le associazion de categoria, davò Nadél per le sozieté, che entánt s’ava bel organizé per podei giourì co l’obligo del green pass, ruáva la bona nuova: i «ristori« i eva enjignei per ester acreditei nte le casse. Promozion turistica e colegament co la Marmolada Nte dut sto scenar melsegur, el setór dei lifc el dezide de cialé ennavánt e scomëte sul davignì e l mët sun taula »Arabba – Marmolada 2030«. Se trata den progét destination management, envié via dal Consorz dei Lifc Reba – Marmolada, auna a le associazion turistiche de Reba e La Rocia che i a dé su a la »Kohl & Partner«, azienda de consulting ativa a live internazional, l’enciaria de svilupé en plán strategich de svilup turistich. El fin l é chël de encrementé la competitivité del comprensor, potenzié i doi teritori, siebelo ogniun da sol che nte en colaborazion co na vijion strategica a lonch tiermen. Depierpoi Funivie Arabba scomencia a programé el miliorament del colegament coi schi co la Marmolada su per el Padon. En progét na cabinovia da Malga Ciapela, el renovament de la segiovia del Padon e la sistemazion de le piste del viers del Fedaia.



Deplù te la edizion stampeda dl 07 de jené.

ABONAMENT 2022 70,00 € por la Talia – INFO aministrazion@lausc.it

ABO E-PAPER https://lausc.it/abonament-e-paper-la-usc-di-ladins