Na ciacolada con Daniele Dell’Andrea, sorastant de la Lia da Mont Fodom–Col per la part de Col
Bondì Daniele, chest an vegnarà dies agn da canche la Lia da Mont Fodom – Col l’à metù man de comedà e segné i trioi de chest pico pais ladin; se polelo fà n bilanz de chesta atività?Daniele Dell’Andrea Ei, no par gnanca vera che siebe passà cussì tant de temp! L eva n valch pèe via per segné fora meo zerti luoch pi carateristizi, ma po ogni strada la eva liada a autre e donca col passà dei agn on curvì, pian pian, se pol dì cuaji dut l intier comun.
Te regordeto ncora cale che é stade le prime tabele che avé metù?Nanter 2012 e 2013 avevane laurà darè per comedà e tornà a fà bel l auteriol de Sant Antone che se ciata su la strada da bosch che lia Pien
con Posauz. Nte chest grant laor Diego (Grones, ndr) e auter de la Lia da Mont da Fodom i eva vegnui ju a ne dà na man. Lori bele da calche temp i ava metù man de segné fora suoi trioi con de bele tabele de legn de lares, bele fate e scrite, e cussì ave domandà se fosse stat l muot den mete de tale incia al scomenzament e a la fin de la strada ulache se ciatava l auteriol. Le prime tabele i é donca stade metude nanter Pien e Posauz e po s’à delongo capì che da Posauz peava via autre dejine de strade e trioi. Chel che avevane metù man de segné l eva l 464 del Cai che portava fin sun Fedare e po su la forzela de Croda Rossa, ma da ilò a mesavia se podeva ruà via n Costauta, via n Forzela, Pianaz; senzà contà che po nanter 2015 e 2016 coi Sizeri s’ava fat l auteriol del Sacro Cuor via l Crep e, per segné le strade che portava ilò, on metù man de mete le tabele incia nte la part del comun che varda del vars de Fodom: Tie, Cianazei, Calcuch, Reciavà e fin via Larcionei. (Intervista: Giulia Tasser)