La Usc di Ladins

L ultimo di de scola fova mpue sciche canche n fina la naia. L auto fova bele njenià, mpifà de cufri dovia y n valguni datrai monce sun tët. La jiva de avëi lerch te auto, davia che l sciafer, per l solit l pere de familia, savova y se ndebitova bele danora a pensé che l ëssa messù furné, o miec, streflé per cënc y cënc de chilometri de viers dl mer. Ma l problem fova che l ne fossa nia stat sëul. Dovia te auto i pitli mperadëures: doi o trëi mëures che se ëssa strità, zancà, stufà y tosc abù massa ciaut. La strategia fova nscila chëla de muever abenëura assé, datrai bele dala 5 daduman, nscila da schivé l trafich dla A22, che i ultimi dis de juni lecurdova n lunesc de Pasca a Gardaland, tan tocia y plëina fovela. N valgun peres se mpruvisova piloc de rally y sce i furnova tl aut Adriatich al mer, astilovi ora la rëssa ndesfidan i jëufs dl Cadore. Ma tla majera pert di caji univel tëut l’autostreda. Passei via Pontives messova l capo sciafer speré che i mutons dovia se ova inò ndurmenzà y dantaldut che deguni ne ti ëssa rejetà l gusté sun i stuei ghiei senf dl pitl Opel Corsa a trëi portes. Ma bele a Pruca scumenciova l’incuisizion di mëures sentei dovia: »Sons’a tosc ruvei?« se lamentova zachei da dovia, ntan che n aspitova che la stanges dla ferata se ëssa inò arlevà. »Tati, sons’a tosc ruvei?« rundeniveò n segondo iede, do che l sciafer ova l rpiem iede a posta inurà la dumanda. Na usc nfantila y frëida sciche l vënt de Pic, che ti fajova capì al sciafer che l ëssa n chël di adurvà n gran pazienza a tré tres ch’l viac.

De plu él da liejer tla edizion nueva de La Usc di Ladins!