La Usc di Ladins

N vënderdi de chëst’ena passeda fòvela tan inant, sun l prugram dla Lia dl Turism la prima dla trëi sëires cun mujiga, l »vënderdi lonch», sun chël che duc à aspità – nsci nes à dit la diretëura dl ufize turistich, Beatrix Insam. Na tel’ pitla jeta ntëur cëina ne à nia ruinà na blòta sëira cun, do la rata, truepa jënt ncantëur tl raion da jì a pe de Urtijëi. Truepa jënt de Urtijëi, ma nce de S. Cristina y Sëlva, y sambën i patins, à scutà su la mujiga de Marion Moroder y Andreas Kondrak. Dut chësc pra n bon got de vin o n pier bel frësch. Mujiga lesiera, nia da bal, ma de bona cumpanìa, a na maniera che n pudova mo saurì se ntënder a s’la ciaculé. 

Osć drët cuntënc 
On sambën nce ulù audì n doi osć, drët cuntënc de pudëi inò avëi na manifestazion cun mujiga dan si portes. »Do doi ani fòvel gran ëura de pudëi inò mëter a jì velch, de pité velch a duta la jënt che vën te Gherdëina. Nce chëi da tlo à ueia de se muever y se ancunté, y chël se ntënden dassënn,« nes conta un di nteressei, ntan che l ti jeta su na buanda a n valgun jëuni. »La sajon à bele scumencià, l mei fova drët ciaut y perchël seméiel che son bele amesa l’instà. Ma perdrët sons permò ala fin de juni. Dan n valgun ani ne ëssen mei pudù o ulù mëter a jì vel’ da de tel da chësta sajon, ma la dezijion de scumencé de juni ie stata la drëta.« 

De plu sëires d’uni sort 
Chësc fova l prim vënderdi lonch, l nes aspieta mo un de lugio y un de agost. Chësta sëires ie pensedes plucheauter per i osć, cun mujiga ntan duta la sëira. I autri vënderdis mët la Lia dl Turism a jì l »aperitif Urtijëi« cun mujiga bele dan cëina, nchin ntëur la 9, canche n ti lascerà la lerch ala butëighes che giaurirà si portes y nvierà mo n iede a jì a cumpré ite. 

Simon P. Moroder